بعد تصدره التريند.. أول تعليق من صاحب فيديو الدليفري: بحب الأهلي ونفسي يبقى عندي شركة مقاولات
تصدر فيديو لـ عامل دليفري تابع لشركة طلبات، تريند مواقع التواصل الإجتماعي خلال الساعات الماضية، حيث ظهر الشاب يقود الموتوسيكل الخاص به أثناء توصيل طلب إلى إحدى المناطق بالجيزة وهو يشاهد مباراة للأهلي، ما أثار إعجاب مستخدمي مواقع التواصل الاجتماعي.
وقال إيهاب هاشم، صاحب الفيديو، في تصريحات خاصة لـ القاهرة 24: أنا بشتغل فى شركة طلبات وخريج كلية تربية، وعمري 33 سنة وناس كتير كلمتني بعد ما الفيديو انتشر ومكنتش متوقع خالص ابقى تريند أو حاجة، ومكنتش واخد بالي إني اتصورت، والجو كان شتاء وبحب النادي الأهلي جدًا وبتابع كل ماتشاته حتى وسط شغلي، أو لو عندي ضغط لازم أشوف الماتش ده، والأصعب إن شغلي فى طلبات لازم مواعيدي تبقى مظبوطة مينفعش تأخير.
أول تعليق من صاحب فيديو الدليفري
وتابع إيهاب: ناس كتير كلموني على الفيديو بس أنا مش بتابع، وشغال في شركة طلبات بقالي فترة كبيرة، والحمد لله على كل حال، وربنا بيكرم وبيرزق أي حد لو اجتهد في شغله وحياته، وربنا بيعوض أكيد طبعا، وأنا كل اهتمامي بشغلي، مش من عشاق السوشيال ميديا، حتى شوفت الفيديو بالصدفة بعدها بفترة، وعلقت عليه وفرحني جدًا إن الناس مبسوطين بيا.
واختتم إيهاب: نفسي يبقى عندي شركة مقاولات كبيرة، ده حلمي من زمان ونفسي أحققه، وربنا يكرمني، وأنا حابب شغلي في طلبات الحمد لله، ومن صغري اشتغلت في المقاولات كتير، وإن شاء الله أحققه، وعشان أوصل للحاجة اللي نفسي فيها لازم أجتهد.
