شقيق ضحية قطار طنطا: “أنا مش مستوعب إن في بني أدم سوي يعمل كدا.. ياريت كانوا خدوه على القسم” (فيديو)

قال تامر عيد، شقيق محمد عيد ضحية قطار طنطا، إن محمد وأحد أصدقائه كانا في إسكندرية ونفذت أموالهم وخلال عودته اتصل الضحية به لكي يخبره بإنه لا يمتلك أموال، قائلا:” قولتله أركب أوبر أو تاكسي وأنا أحاسب، لكن قرر هو وصديقه ركوب القطار، وقال للكمسري إحنا مش معانا فلوس، ففتح لهما باب القطار وقال لهما أنزلوا هنا بقي”.

وأضاف شقيق الضحية، خلال مداخلة هاتفية ببرنامج “القاهرة الآن”، المذاع على قناة “الحدث”، أن القطار كان يسير على سرعة عالية، مؤكدًا أن الكمسري هو الذي فتح لهم الباب وقال لهم إنزلوا هنا، ” ربنا يعين والدتي إحنا 3 صبيان وفي بنت لسة متوفية قريب،  وأنا عايز أعرفه هو في بني أدم سوي يعمل حاجة زي كدا يا ريت كان خده القسم كأن البني آدمين ملهاش ثمن مش قادر أستوعب”.

وفي وقت سابق، روي حسن السيد أحد شهود عيان واقعة إجبار شابين على القفز من القطار، ما أسفر عن وفاة أحدهم، آخر كلمات الشاب محمد عيد عبدالحميد عطية، ضحية الكمسري، وقال إنه كان يستقل عربة رقم 4 بالقطار كرسي 5 ويعد ثاني كرسي بجوار الباب، وجدت صوت عالي، قائلا:” لقيت سواق القطار بيقول لحد معكش فلوس فرد عليه الضحية لا مش معايا فلوس فقاله هات بطاقتك، فقاله أنا مش معايا بطاقة، فرد عليه الكمسري خد بعضك وأنزل من القطار”.

وتابع السيد، خلال مداخلة هاتفية ببرنامج “القاهرة الآن” مع لميس الحديدى، المذاع على قناة الحدث، ” طب أنا هنزل من القطار إزاي فرد عليه الكمسري لا القطار مهدي بالرغم من أن القطار ماشي، فقله أنزل المحطة اللي جاه وسلمني، قاله لا هتنزل هنا فأنا كنت سامع المناقشة فروحت أشوف في إيه لاقيت الباب مفتوح وواحد بينط ده الأول، ولكن الضحية قولتله مطنوطش أنا هدفعلك التذكرة فلقيته باصص للكمسري وقاله حسبي الله ونعمة الوكيل، وكان نصه في الأرض ونصه في الحديد وكان ماسك باب الحديد ونصه بيجر جاي أشده ساب أيدي ونزل تحت القطار .. أنا شوفته بعيني تحت القطار”.