لقاء الخميس عن الأمومة: “بعد صراع نفسي كبير وصلت إن نجاحي هو نجاح ولادي” (صور)
تطرقت النجمة لقاء الخميسي إلى موضوع يشغل بالها وشاركت جمهورها بعض تفاصيله، فطرحت سؤالًا عن ما الأهم، اهتمام المرأة العاملة بمستقبلها أم اهتمامها بتربية أولادها تربية قويمة.
فعبر حسابها الرسمي بـ”انستجرام”، نشرت مجموعة من الصور لأبنائها وزوجها اللاعب محمد عبد المنصف، وطرحت سؤالها قائلة: “السؤال الأبدي اللي بيزن طول الوقت في دماغ الست العاملة الطموحة، مستقبلي ولا مستقبل ولادي؟، أنجح وأحقق أحلامي، وطبعًا دا متعارض مع الاهتمام بالأولاد في الزمن والوضع المزدحم المشحون اللي إحنا فيه”.
وأضافت معبرة عن مدى صعوبة الوصول لإجابة عن ذلك السؤال: “ولا أخد بالي من ولادي وأنسى أحلامي، سؤال صعب جدًا، الحقيقه إن لازم يكون في إجابة واضحة لسؤال أهم، أحب نفسي أكتر ولا أحب ولادي أكتر، هنا الدماغ بيقف وحياة الست بتبقى مليانة صراعات نفسية كبيرة وبالتالي جسدية”.
واستكملت مضيفة بأنها ترى بأن المرأة طالما اختارت أن تصبح امً فعليها أن تكوم أولويتها لأولادها: “الحقيقة على حسب أنت بتحبي نفسك أكتر ولا بتحبي عيالك أكتر ولا بتحبي نفسك في عيالك، طالما اخترنا نبقى أمهات، مجبرين إن الاولوية تبقى للولاد، حتى لو في يوم من الايام هايمشو ويسيبونا ويبقى ليهم حياتهم، حتى لو هانبقى لوحدنا ومش هانبقى حققنا أحلامنا ووقفنا في نص الطريق، طالما اخترنا لازم نبقى قد الاختيار، طالما الاختيارات بتتعارض مع بعضها وإن لازم وحتمًا اختيار يعلى على التاني”.
وأردفت بأنها توصلت في النهاية بأن نجاحها يأتي من نجاح أولادها: “سؤال دايمًا كنت بسأله لنفسي، مستقبلي وحلمي ولا مستقبل ولادي وحلمهم، الحقيقة إني بعد صراع نفسي كبير وصلت إن مستقبلي ونجاحي هو نجاح ولادي اللي هما كل قلبي وروحي واللي هما أنا لقاء، اه نفسي أعيش واستمتع وأتحقق وأحلم وأعمل اللي ما يتعمل، بس للأسف دة كان ينفع، لو كنت اخترت إني ابقى سينجل، لكن طالما الاختيار كان فيه أولاد يبقى نفذ السيف”.
وأكدت لقاء قائلة: “الولاد هما النجاح الحقيقي اللي دايمًا مابنبقاش واخدين بالنا منه في ظل صراعاتنا للوصول لأحلامنا الكبيرة وتضحياتها، الولاد هما الحلم الحقيقي، والحقيقه إن ماحدش بياخد كل حاجة، ممكن ابقى ميجا ستار وولادي ضايعين، وممكن أبقى ممثلة مهمة وموهوبة ومحترمة وولادي ناجحين، وممكن اختار إني أبقى نجمة وبلاها أولاد”.
وفي سياق مختلف، تستعد النجمة الخميسي لتصوير فيلم جديد يحمل اسم “للبنات فقط”، بطولة كل من لقاء الخميسي، وجينا سليم، ومنة جلال، ولى لى قاسم، تأليف أيمن سليم ، ومن إخراج سيد الحسيني.
